COSADIELLA I 

 

(Letra deTeodoro Cuesta)

 

¿Qué cosa cosadiella ye una cosa,

(y non ye cosadiella revesosa)

que s´encueye, s´espurre o s´enduviella

y estadoñu paéz, blima o civiella?

 

Manancial de llaceries ye, y de sustos,

d´empapiellos, moquetes y desgustos.

Ya llimiagu se fai o esculibiertu,

o merucu  pol xelu medio muertu:

ya provéz o mermando s´atristaya

o de rabia s´engrifa y esmocaya.

Boca tién y non fala, nunca come,

y si aporta  a enfermar sospira l´ome,

pues ye cosa d´antiguo persabida

qu´alaxa ye del home muy querida.

 

¿Tú non diésteis n´el quiz? -Pos en concencia

acertixu non ye de muncha cencia,

y a poco que escurráis sabréis la cosa,

pos non ye cosadiella revesosa.

 

Dirévos, además, que tién llocura

por metese nos cloyos y que fura,

si la dexen furar les fíes d´Eva,

un chirlotu dexándoyos na cueva.

 

Cuando moza barrunta ponse ufana

y espabila dexando la galvana,

piegando, ¡picarona!, saltiquinos,

sentir faciendo al home  regolvinos.

 

Siempre vive´ncerrada ente costures

y más dañible ye que les gafures;

llombrizuca paéz si entra  en el río,

amúrniase d´afechu con el frío;

dos hermaninos tien, sofridos... mudos...

ella sin un pelín, ellos peludos,

que se llamen...

 

¡Abasta!, dixo un mozu,

la montera tirando d´alborozu:

po les señes que Pachu nos da y cunta,

el diablu me les quiebre, ye la punta.